Arkivs
Pīktdiņ, 2001 gods juņa (vosorys) mieneša 8 d.
Latgolys Muzykys televizejis festivalī Rēznī (Rēzeknī) nu 1 da 3 juņam pīsadaleja 43 kolektivi nu Latvejis, 1 - nu Lītovys (Šauļu popgrupa "Fanky"), nu Krīvejys - grupa "Agata Kristi", Valerijs Meladze, kai ari Jeļena Perova nu grupys "Licej".
Kūpā koncertūs daleibu jēme ap 700 daleibnīku. Visvairuok - Latgolys tautys muzykys koncertā - 11 kolektivu ar 236 daleibnīkim.
Festivaļa koncertus apmeklēja ap 10 000 skateituoju.
Festivali organizēja sabīdriskuo organizaceja "Festivāla Fonds", dybynuota specialai, lai turpynuotu pyrms 10 godim Latgolys televizejis īsuoktū tradiceju.
Festivalī skanēja vairuoki pyrmatskaņuojumi - īpaši tyka veidota jaunā skaniejumā "himna" - Juoņa Logina dzīsme "Mēs tavi bērni", kuru atskaņuoja Rēznis simfoniskais orkestris, festivaļa hors un Latgolys solisti (Atis Auzāns (Daugpiļs), Aīda Rancāne (grupa "Ārpus laika"), kai ari Rēznis bārnu popgrupys "Hip-hop" solisti.
Atkluošonys koncertā mieginuojam restaurēt E.Karūdznīka un A.Rancānis "Skaidrū volūdu" ar Latgolys solistim - vokalistim un Rēznis pyutieju orkestri, jo teiši pyrms 10 godim itei dzīsme pyrmūreiz īsaskanēja pyrmajā festivalī un "aizguoja" tautā.
Īpašu programu festivaļam beja gatavuojuši Rēznis kūri: "Austreņs" - Arņa Eversa originaldzīsmis, bet "Azarzeme"- latgalīšu tautys dzīsmis Ilonys Rupainis (jei beja festivaļa muzykaluo producente) apdarē.
Juosoka, ka īpaši bejom dūmojuši, lai kotrā koncertā byutu kaids latgaliski muzykals akcents. Pat bārnu koncertu, kurs gon beja popmuzykys žanrā, nūslēdzem ar divom latgaliski skanūšom dzīsmem: daugpilītis Jelenys Švilpis un upeitīša Ontona Slišāna "Smaidi mozu smaideņu", bet kulminacejā - rēznītis Sandrys Mežuoris un Franča Kempa "Pasoki, bruoleit!".
Festivaļa koncertu amplituda - vysai plaša, kai poši sokom: nu gluožu i buteļu muzykys (kas gon beja vairuok intrigai dūmuota) leidz simfoniskajam orkestram. As kai režisors-insceneituojs ar koncertu muzykalū kvalitetu vysumā asu apmīrynuots. Grybātūs iz prīšku struodojūt īsaistēt festivaļa organizeišonā vairuok jaunus cilvākus ar svaigom idejom. Mēs - rodušuo grupa jau nu rudiņa pruotuojam par daudz kū, kai festivali padareit muzikali augstvierteiguoku. Beja dūma par simfoniskuos muzykys un dūdu ansambļa sintezi, gribējam kaidā lelokā skaņdorbā īsaisteit Latgolys ermonikys. Bet beja daudz vysaidu škieršļu: pat reizem naticeiba, ka festivaļs nūtiks. Jo daudzim cylvākim tys laikam irā kai dodzs acī: cīši vīnaldzeiga pret festivali beja Rēznis Dūme, mīsta Kulturys centrs, ari Latvejis televizejā, kab dabuotu atļauju tīšraidei, vajadzēja izcīneit karus. Ari šudiņ losu "vītejū" aveizi - Latgolus golvonajam kulturys nūtykumam paguojušajā nedeļā - festivaļam - vīta atrosta viņ 11 puslopā, dažu uorkuorteigi vuoji žurnalistiski uzraksteitu rindeņu garumā. Voi aveizei, kura pretendej iz nūvoda nedelis aveizi, nabeja inceresnai veiduot reportažu nu festivaļa, jo tur beja tik daudz gon daleibnīku, gon kolektivu. Varēja izskaneit ari dažaidi redzīni par festivaļa koncertim (pat muzykys specialistu), viertejūt festivali ari kai muzykalu nūtykumu, kai jis ītekmej muzykalūs tradiceju atteisteibu nūvodā. Dieļ tuo myusim - festivaļa organizatorim byutu cīši inceresnai dzērdeit gon koncertu daleibnīku, gon klauseituoju, gon TV skateituoju redzīņus par festivali.
Nu Latvejis televizejis vadeibys sajimts atzineigs viertiejums, un rudiņa pusī festivaļa koncerti tiks atkuortuoti ēterā LTV 1.
Voi par godu byus festivaļs? Gryuši tān pasaceit. Vysmoz mēs - organizeituoji un rodūšī cylvāki asom tam gotovi, myusim pošim tys irā devs jaunu elpu, jo (piec Latgolys televizejis likvidiešonys) struoduojam par veļti - nasajamūt par tū ni santima. Jaunīs festivaļs Rēzne 2002 varātu byut vēļ daudz grandiozuoks. Bet mēs gaidom cylvākus, kas myusim gotovi īt tolkā (koč voi ar idejom - vajag "svaigu ašņi"). Varbyut jau tān kaids ir gotovs pīsateiktīs? Tod zvonit: 46-25857, 46-33466!
Īsyutejs:
Voldemars Ivdris
© 2000-2024, Aņss Ataols Bierzeņš Myusu E-posta adress: latgola@latgola.lv
Ituos puslopys pādejuo papruoveišona: 2002 gods juļa (sīna) mieneša 2 d.