Gerbs

Aktualumi

Arkivs

Volūda

Literatura

Viesture

Muoksla

Etnokultura

Dūmu meiti

Breivī servisi

Gostu gruomota

Saitys













. (.)


latgola.lv

Catūrtdiņ, 2001 gods janvara (jaunagods) mieneša 25 d.

Saīsme Vuiceibys i zineibys ministrejā

    Latgolys instituts pīsadaleja saīsmē, kuru tyka sasaukuse Latvejis Republikys Vuiceibys i zineibys ministrejis Vyspuoreiguos vuiceibys departamenta Integracejis nūdaļa. Saīsmis mierks beja sarunu aizsuokšona iz vyds Latgolys regiona navaļstiskuo sektora i Latvejis Republikys vaļdeibys ap tū, kab vyspuoreiguos vuiceibys materialus papiļdeit ar materjalim par latgaļu volūdu, literaturu i kulturys viesturi, taipoš ar tekstim latgaļu volūdā.
    Īprasejums pīsadaleit sarunuos beja Vuiceibys i zineibys ministrejis (VZM) oficialuo atsaceišona iz viestuli, kuru Rēsnē 2000. gods 16. dekabrī paraksteja Pīters Keišs nu Latgaļu bīdreibu asociacejis vuorda, Imants Slyšāns nu Latgaļu volūdys, literaturys i kulturys viesturis školuotuoju asociacejis vuorda, Juoņs Eļksnis nu Latgolys kulturys centra vuorda i Iļža Myurineica nu Latgolys studentu centra vuorda. Viestulē Latvejis Republikys vaļdeiba beja praseita aktivai dareit, kab realizēt Volūdu lykumā nūstateituos latgaļu literaruos volūdys sorguošonys i guojuma nūdrūsynuošonys garaņtejis.
    Janvara [jaunagods] m. 25. d. saīsme izabeidze ar itaidim rezultatim:
   1) Ar 2001. gods marta mienesi aizsuocūt, Latgaļu volūdys, literaturys i kulturys viesturis školuotuoju asociaceja (LVLKVŠA) var aizjimt vīnu puslopu sevkurā VZM laikroksta "Izglītība un Kultūra" ("Vuiceiba i Kultura") numerī, publicejūt materjalus latgaļu volūdā.
   2) LVLKVŠA, taipoš akademiki i cytys aiziņteresātuos personys īpraseitys pīsadaleit školys gruomotu vērtinis "Dzimtā valoda" ("Muotis volūda") sagataveišonā 4.-9. klašu školānim. Kas gods byus publicejamys treis gruomotys (školānu gruomota, školuotuoju gruomota i tekstu gruomota) vīnai kurai klasei, suocūt ar 4. klasi itymā godā.
   3) VZM apsūleja naudisku atspaidu, ni leluoku kai 5000 latu, latgaļu literaturys antologejis "Latgaliešu literatūra" ("Latgaļu literatura") ūtram laidīņam nūdrukavuot. Ministreja taipoš pasūleja izplateit gruomotys.
   4) VZM apsajēme suokt sarunys par kiuris organiziešonu, kura, kūpādareidama ar Latgolys NVO, tolkuotu pi latgaļu volūdys materjalu īvesšonys vuiceibys programuos.
   5) VZM Vyspuorejuos vuiceibys departamenta Integracejis nūdaļa 2001 gods kai Europys volūdu gods kontekstā vadynuoja riedeit seminaru i pasūleja Latgolys institutam, kūpādorūt ar cytom organizacejom, sagatavēt i padūt VZM seminara projektu.
    Saīsmē pīsadaleja: Evija Papule - VZM Vyspuorejuos vuiceibys departamenta Integracejis nūdalis viersineica, Sandra Grunte - VZM Vyspuorejuos vuiceibys departamenta Integracejis nūdalis vacuokuo referente, Ineta Spolīte - VZM Vuiceibys programu guojuma i eksaminacejis departamenta vacuokuo refereņte, Imants Slišāns - LVLKVŠA volda puorstuovs, Juoņs Eļksnis - Latgolys kulturys centra viersinīks, Zane Kūceņa - Latgolys instituta viersineica, Lideja Leikuma - Latvejis universiteta asociātuo profesore, Anta Rugāte - LVLKVŠA puorstuove, 7. Seimys deputate, Iļža Myurineica - Latgolys studentu centra puorstuove.

Īsyutejuse:
Zane Kūceņa





© 2000-2017, Aņss Ataols Bierzeņš        Myusu E-posta adress: latgola@latgola.lv

Ituos puslopys pādejuo papruoveišona: 2002 gods juļa (sīna) mieneša 2 d.